Çaydan tapılan kitabların və əlyazmaların müəllifi tapıldı - FOTO

news/2025_04_22/caydan_kitab_1745316065.jpg

CƏMİYYƏT

256

22.04.2025, 14:00

Masallı rayonunun Çaykəş çayından tapılan kitablar və əlyazmaların bir hissəsi oxunub.

Oxu24.com APA-ya istinadən xəbər verir ki, kitablar və əlyazmaların müəllifinin Şeyx Cəlal Lənkərani olduğu müəyyən edilib.

Qeyd edək ki, Şeyx Cəlal Lənkərani cənab bölgəsinin görkəmli alimlərindən və dəyərli ruhanilərindən biri olub. O, 1885-ci ildə Masallı rayonunun Kolatan kəndində doğulub. Şeyx Cəlal 1900-1920-ci illərdə İran və İraqda dini təhsil alıb. O, riyaziyyat, astronomiya və həndəsə elmlərinin də bilicisi kimi tanınıb.

Şeyx Cəlal 1920-ci illərin ortalarında Kolatana qayıdıb. Quran qiraəti, əhkam və İslam maarifi sahəsində dərslər təşkil edib.

Təzyiq və təqiblərə məruz qalan Şeyx Cəlal Lənkərani 1928-cı ildə Biləsuvar rayonuna köçüb. İki ay sonra məxfi şəkildə dinin fəaliyyət göstərdiyinə görə həbs olunub və on il həbs cəzası alıb.

Şeyx Cəlal 1938-ci ildə həbsdən azad olub.

Lakin bir neçə aydan sonra yenidən həbs olunub və Qazaxıstana sürgün edilib.

1948-ci ildə Azərbaycana geri döndükdən sonra 1957-ci ilə kimi Bakının Buzovna qəsəbəsində yaşayıb və gizli şəkildə dini dərslər təşkil edib.

1957-ci ildə doğulduğu Kolatan kəndinə qayıdıb və ömrünün sonuna kimi Kolatanda yaşayıb.

1961-ci ilin mart ayında Kolatan kəndində vəfat edib və Kolatan qəbiristanlığında dəfn olunub.

Xatırladaq ki, tapılan 100-ə yaxın kitab və əlyazmaların sahibləri onları ailə münaqişəsi zəminində yandırmaq istəyiblər, lakin yanmadığını görüb çaya atıblar.

Artıq kitabların bir qismi Masallı rayon tarix və diyarşünaslıq muzeyinə təhvil verilib. Bu gün də digər kitabların təhvil verilməsi nəzərdə tutulub.

Həmçinin oxuyun