Volodin Venesuelaya Nikolas Maduronun andiçmə mərasiminə gedir

Rusiya Dövlət Dumasının sədri Vyaçeslav Volodin Cənubi Amerika ölkəsinin seçilmiş prezidenti Nikolas Maduronun inaqurasiya mərasimində Rusiya Federasiyasını təmsil etmək üçün Venesuelaya gedib.

Oxu24.com  xəbər verir  ki,bu barədə RİA Novosti məlumat yayıb.

Mərasim Karakasda baş tutacaq.

Yanvarın 10-da Nikolas Maduro üçüncü dəfə Venesuela prezidenti kimi and içəcək. Mərasim ölkədə ötən ilin iyulunda keçirilən seçkilərdən 5 ay sonra baş tutacaq. Rəsmi məlumatlara görə, Maduro 51,2% səslə qalib gəlib.

Maduronun əsas rəqibi seçkinin nəticələrini tanımayan müxalifət lideri Edmundo Qonzales Urrutia idi. Argentina, Qvatemala, Kosta Rika, Peru və Çili də daxil olmaqla bir çox Latın Amerikası ölkələrinin liderləri də seçkinin nəticələrini rədd edib və ya şübhə altına alıblar. Qonzalesin qələbəsi bir sıra Qərb ölkələrində, o cümlədən ABŞ-da tanınıb.

Nikolas Maduro Huqo Çaves hökumətində xarici işlər naziri (2006-2013) və Venesuelanın vitse-prezidenti (2012-2013) vəzifələrində çalışıb. Maduro 2013-cü ilin martından aprel ayına qədər Venesuela prezidentinin səlahiyyətlərini icra edib. Daha sonra o, ölkənin prezidenti seçildi. O, 2024-cü ilin iyulunda üçüncü müddətə yenidən seçilib.

Bundan əvvəl Maduro Venesuelanın vitse-prezidentinə qarşı sui-qəsd hazırlandığını açıqlamışdı.

 

Nigar